Aschirladz român’i pliguiţ tru Afganistan

aschirladz român’i pliguiţ tru afganistan Optu aschirladz români ţi eara misiuni tru Afganistan fura pliguiţ, luni, tru unna ataca scandil’e.

Tu România, minivacanţa dit 1 di Mai fu sum aumbră di furn’ia a hăbarlor slabi ti vinira dit Afganistan. Luni, optu aschirladz dit Batalionlu 30 Protecţia a Forţăl’ei „Orn’ili a Carpaţlor” dit Câmpulung-Muscel (sud) fură pliguiţ anda eara tu una misiuni faptă tru zona di responsabilitati, hiindalui ţinta a unăl’ei atacă scăndil’e. După protili 24 di săhăţ ţi li tricură sum vigl’earea a yeaţărlor dit Baza Kandahar, şapti di aschirladz fură externaţ şi s-turnară tru campuslu a batalionlui românescu. Maşi un camarad a lor fu purtat la un spital dit Ghirmănie tră evaluări medicali suplimentari. El fu pliguit la măna dreaptă, ama catastisea a lui easti bună. Cărvanea cu aschirladz român’i eara tru ună hoară ţi easti aproapea di aeroportul dit Kandahar cându un kamikazi s-detonă tru una aftuchină. Tru zonă avea şi mulţă cilimean’i, a deapoa 11 di el’i chirură tru atacă. Uidisitu cu hăbarea di la poliţia locală, detonarea s-feaţi tru oara căndu aschirladzl’i român’i eara nafoara a vehicului blindat cu cari patrula. Prezidenţil’ea ali Românie, Guvernul, Parlamentul pitricură mesaji tra s-lă da curayiu nica şi di andrupari a aschirladzlor român’i, victimi a atacăl’ei kamikazi dit Afganistan şi a fumeiilor a aiştor. Mărl’i ufiţial’i di Bucureşti fură andrupăţ di ambasadorlu american aflat Bucureşti, Hans Klemm. El pitricu a aţilor optu aschirladz româi’i haristuserli a lui şi a Statilor Uniti tră serviciul a lor tru arada a misiunil’ei NATO dit Afganistan. "Aeşti român’i mplin’i di curayiu loară parti la multi misiuni tru Afganistan şi Kosovo, tra s-aducă libirtati şi democraţie tru locuri greu aguditi di polim", cundil’e  diplomatlu american. Aschirladzl’i dit Câmpulung-Muscel au tru lucru ună misiuni tru Afganistan dimi tru chirolu a meşilor şcurtu - agustu 2018. Misiun’ili suntu, prota ş-prota, cu scupolu tra s-asiguripsească forţa dit Baza Aeriană Militară Kandahar şi di instruiri, consilieri şi asistenţă a Forţilor Naţionali Afgane. Unitatea militară dit Câmpulung-Muscel nica ari executată misiuni tru Kosovo, tru 2005 şi 2007, cum şi tru Afganistan, tru 2008. România l’ia parti la misiunea NATO dit Afganistan cu 625 di aschirladz. Alţă aproapea 300 suntu disvărtiţ tru operaţii sum cumandul ali UE, ONU şi OSCE tru alti regiuni. Tru chirolu a misiun’ilor externi di până tora, 29 di aschirladz români ş-chirură bana şi 185 fură pliguiţ. Catastisea di securitati dit Afganistan nica easti nistabilă, nai cama multi incidenti s-feaţiră tru provinţiili dit estul şi sudlu a văsiliiléi. Forţili NATO cari asiguripsescu securitatea a bazilor militari şi a centrilor importanti a Afganistanlui armân ţinti permanente a născăntor atacuri a insurgenţălor.

 

Autor: Ştefan Stoica

Armânipsearea: Taşcu Lala


www.rri.ro
Publicat: 2018-05-02 11:20:00
Vizualizari: 584
TiparesteTipareste